Parècc agn fa, par andà ‘n Üstràglia cùi bàrchi a véla, sa ga metéva vot mesèt u àa ‘n pitìn depü.

Ciürma e pasegér i stàva sü ‘n sti güs facc sü de lègn int ancalcàa cùma i sardìni ‘n scàtula andàndu sü e giù cùma ‘n pigòlsa tüt al sàntu dì.  I durmìva giù ‘n stìva ‘n tèli amàchi tacàdi sü cùma i noss salàm an de l’invòlt e i maiàva iscì a purscèl ròba tüta ‘nfümegàda cundìda cùi scìguli e sa ‘mpienìva la büsèca de patàti cun amò sü i pelàtuli par mìga ciapàs al scurbùto.  Se i vàva mìga a pich prìma u se i ciapàva mìga föch e i ga rüàva rüà viv, cùi sultàva giù de sti strangàgn, i basàva la tèra e i ringraziàva ‘l Signùr de avèla scampàda amò ‘n bot.

Dòpu, cun i bastiméncc a carbùn, an dùma ‘na quaranténa de dì, àa se négru cùma la cadéna dèl fugulàa, ta rüàvat a destinaziùn.

Mìga tant témp fa, cùra su partìi cun tancc d’òtri por diàu cùma mì par andà a tö giù i sterlìni e i “dulùri” (cùma i cüntàva sü) tacàa sü par i bedùli chilò ‘n Üstràglia, gh’éra li mutunàvi che li ga metéva dùma 28 giurnàdi par fa sü la traversàda di ucéani e rüà scià ‘n sta tèra de cangùri.

Ma regòrdi amò mè ‘l füdés iér i ültìm dì prim de ‘ndà.  Par fa cicà ‘n pòo de invìdia i mée amìs, andàvi ‘ngìru cun al müs de tòla a dìgal a tücc, che sarési ‘ndacc an cruciéra par i “mari del sud” e che arési facc l’americàn. Al ma paréva pròpi de èss an sciùr; dòputüt mìga a tücc al ga càpitava de fa ‘n viàcc iscì lunch e par de pü a röda sénsa pagà. 

Sugnàvi ròbi che éri vìsti dùma al cìnema Pedrèt ilò a Tiràn, chìli ràri òlti che i ta dàva cinch ghèi par crunpà ‘l biglièt de ‘ndà de int.  Culaziùn a mèza dumàa int par al lècc e pitanzìn par disnà e scéna, cun camerée tücc anguantàa de biànch cun sü ‘l cravatìn che i ta dàva dèl lüü e i sa sgubàva giù a fat l’inchìn dùma a vedèt, nüdadìna an piscìna e pusìn de dopumesdì anchigurgnàa sü par li sdràiu, maiadèi cùi tiragùla vèrs li quàtru e àla sìra, dòpu ‘n scenìn de nabàbu, cun sü ‘l vestìi bun u ‘l frach négru cùla cùa, bài de gran lüsu con bòzi de vin de chèl che büscia a dunzéni par àla fin sintìs , “ritirarsi” an gabìna privàda cun servìzi sül punt de cumàndu e ‘n bèl vedè “sulla distesa dell’azzurro mare” fo dèl’ublò.

 Fanfàri e pìvi a sunà alingrànda al mè rüà “in Terra Australis”.  Ansùma, par chìi témp, al custàva poch u nigùt sugnà; gh’éra dùma po quèl!!

Al su mìga se ilò a Tiràn gu lu dàcia de bév ài mée amìs u se iè amò rée a grignàm derée di spàli ma adès, dòpu tancc agn, pödi àa cüntà sü cùma l’è ‘ndàcia.  An sti témp che cur, andèche tücc i ga présa e sa ga àa pòca vöia de fa sü ‘na bèla grignàda, u pensàa, par fa spas e badentàv, de sta stòria mètüla giù ‘n pòo àla mìa manéra, cundìda sü cun an pitìn de fantasìa e mès’cià a quài vargutìni d’òtru; mì su sémpru de spìrit alégru e ‘l ma piàs grignàch sùra ài ròbi pasàdi àa se li duarés fat lücià dùma a regurdàli.

Cici Bonazzi

( a cura di Ezio Maifrè)

Lettura di Ezio (Méngu)

Clicca qui